الي بقى لي مع الأيام .. وفٌيته
والضيق لو ينهمر تشربه ودياني
ماهي كبيره علي والحزن غنيته
ولاهي غريبه اذا وقتي تحداني
كم جرح خذته من الأحباب .. ضميته
وجروح قلبي زكاه لحب خلاني
مطعون ؟ عادي , جفا الأقارب ؟ داويته
تعبان ؟ حدي , ردى هالحظ ؟ خاواني
صدمه ؟ بسيطه , هوان الحال ؟ مريته
مقرود ؟ أدري , واذا حرمان ؟ عداني
مافاح هم لك والله ما تقهويته
و مامر حزن بغيري ما تبلاني
ياما وياما من الخذلان .. عديته
إلا بصاحب .. بعد العشره تناساني
أزريت لأنسى غيابه لين ناديته
والموت لامن تجاهلني وجافاني
وينه يجيني .. وكل عتاب كنيته
ياليت يدري بعد فرقاه وش جاني
من كنت طفل وانا أرجاه في بيته
شيبت.. وأثره على هالحال خلاني
حتى جناح العتب لرضاه ذليته
ماطرت بعده فرح من ذل جنحاني
ياقلب صبرك.. ترى كل شي سويته
ماكان افضل من اللي كان بإمكاني
لو بي قوه على الهجران ؟ خليته
لوبي ذره من النكران ؟ يفداني
الجرح أرحم.. اذا يرجع من أغليته
مجروح ؟ فدوه.. ولكن صعب وحداني
الشاعر/ عبدالله الظفيري
موضوع: الجراح 
الثلاثاء 28 يوليو 2009, 6:33 am